ភ្នំពេញ៖ ប្អូនប្រុសរបស់លោកបណ្ឌិត កែម ឡី គឺលោក កែម រឹទ្ធសិទ្ធិ បាទអំពាវនាវទៅកាន់គណបក្សនយោបាយនិងបណ្ដាសារព័ត៌មានប្រឆាំងនឹងរាជរដ្ឋាភិបាលមួយចំនួនឲ្យឈប់យកឈ្មោះបងប្រុសរបស់លោកទៅធ្វើជាឈ្នាន់នយោបាយ។

ក្នុងវីដេអូដែលមានរយៈពេលប្រមាណ ៣ នាទី បង្ហោះនៅថ្ងៃទី១០ ខែកក្កដា ចំខួប៨ឆ្នាំនៃការស្លាប់របស់លោក កែម ឡី លោក កែម រឹទ្ធសិទ្ធិ បានលើកឡើងថា៖ «ឆ្លៀតពេលវេលានេះដែរក៏សូមអំពាវនាវទៅដល់គណបក្សប្រឆាំង អង្គការសង្គមស៊ីវិល ប្រព័ន្ធផ្សព្វផ្សាយផ្សេងៗដូចជាវិទ្យុអាស៊ីសេរី កាសែតខេមបូឌាដេលីសូមបញ្ឈប់នូវការយករូបភាពសពលោកបណ្ឌិត កែម ឡី ទៅធ្វើជានយោបាយឬមួយក៏យកធ្វើជាឈ្នាន់ដើម្បីកេងចំណេញនយោបាយ។ លោកបណ្ឌិត កែម ឡី គាត់បានស្លាប់ទៅហើយទុកឲ្យវិញ្ញាណក្ខន្ធរបស់លោកបានសេចក្ដីសុខ»។

លោកបានស្នើទៅកាន់គណបក្សនយោបាយក៏ដូចជាបណ្ដាសារព័ត៌មានដែលតែងតែកេងចំណេញពីការស្លាប់របស់លោកបណ្ឌិត កែម ឡី ឱ្យរិះរកមធ្យោបាយផ្សេងដើម្បីទាក់ទាញប្រជាប្រិយភាព នឹងធ្វើយ៉ាងណាដើម្បីជួយទៅដល់ប្រយោជន៍របស់ប្រជាពលរដ្ឋ។

ជាមួយគ្នានេះលោកក៏បានអរគុណសម្ដេចតេជោ ហ៊ុន សែន និងក្រុមគ្រួសារដែលតែងតែជួយដល់ក្រុមគ្រួសារលោកបណ្ឌិត កែម ឡី តាំងពីបុណ្យសពលោក កែម ឡី ១០០ថ្ងៃ មកដល់ពេលនេះ។

លោកក៏បានថ្លែងអំណរគុណទៅដល់មហាជននានាដែលនៅតែគោរពស្រឡាញ់និងនៅតែចងចាំឈ្មោះប្អូនប្រុសរបស់លោកផងដែរ៕